Den grøne, frodige våren i Luster er særleg vakker. Kontrastane i naturen er sterke, med blømande frukttre ved fjorden, grøne lier og snøkledde fjelltoppar. Fjorden har skore seg ut av landplata før istida kom. Lustrafjorden er den inste delen av Sognefjorden.

Frå Lustrafjorden har du panoramautsikt mot Feigumfossen, eit av dei høgste fossefalla i Noreg med 218 meter fritt fall. Sognefjellet, Nord-Europas mest høgtliggjande og imponerande høgfjellsovergang (1430 m.o.h.), er for mange første smakebiten av Luster når du kjem austfrå Gudbrandsdalen og Lom. Her finn du eit storslått utsyn mot dei høge og mektige tinderekkjene Hurrungane i Vest-Jotunheimen, med i alt 24 toppar over 2000 meter. Den Norske Turistforening har mange merka ruter både i Breheimen og Jotunheimen. Ti av DNT sine hytter ligg i Luster.

Jostedalsbreen er den største isbreen på det europeiske kontinentet med eit flatemål på nær 500 km2. Frå dette veldige ismassivet greinar kjende brearmar som Nigardsbreen, Bergsetbreen, Tuftebreen, Fåbergstølsbreen og Austdalsbreen seg ned mot Jostedalen.