Dette er turane

Her kjem dei 15 siste turane.
Dei fyrste 16 finn du i "turar 1".

Klikk på fyrste bokstaven.

Vetledalen-Vetledalsnosi
Turtagrø-fremste Skardstølsvatnet
Turtagrø-Fannaråken
Turtagrø-Dyrhaugsryggen
Kinsedalen-Dalastølen
Bergheim-Feigedalen
Krossen-Molden
Rupheim-Skoganipa
Soget-Simosete-Turrli
Tungestølen-Austerdalsbree
Berge-Børesteinen
Røssesete-Hellesetvatnet-Jagershaug
Dalsdalen-Lø/Hornane
Yttri-Lønningane
Middalen-Illvassnosi

Vetledalen-Vetledalsnosi

Utgangspunktet for denne turen er anleggsvegen innover Vetledalen, eit stykke forbi Nørdstedalseter. Ein parkerer bilen rett sør for toppen og går i retning Tjørningsvatni, som på nyate kart også blir kalla Kyrningsvatni. Det er ingen sti oppover, så ein lyt sjølv passe på retninga. Vel oppe ved osen på det fyrste vatnet skal ein bryte av vestover og sikte direkte mot toppen. Ein slik tur utanfor opptrødde stiar gjev noko meir, ein får kjensla av å gå meir på eiga hand. Utsynet er fint ned mot Nørdstedalseter og rundt mot dei ulike fjella i Breheimen.

Høgdeskilnaden mellom anleggsvegen i Vetledalen og toppen er omlag 600 meter, og du lyt rekne med rundt 2 timar til toppen.

Turtagrø-fremste Skardstølsvatnet

Utgangspunktet er Turtagrø, der ein parkerer bilen vis a vis Turtagrø Hotell. Stien kryssar elvi frå Helgedalen på god bru og går vidare gjennom vierkratt fram til den fyrste kneiken opp mot Skagadalen. Til venstre innover Helgedalen ser ein no både Fannaråken og Steindalsnosi. Etter den fyrste harde stigninga går stien langs elva innover, og passerer eit såkalla bekkeinntak, eit lite damarrangement der vatnet blir ført inn i tilløpssystemet til Fortun kraftverk. Etter ei stund kjem den andre harde stigninga, som endar opp ved fremste Skardsstølsvatnet og Norsk Tindeklubb si lagshytte, som dessverre ikkje er open for ålmenta. Om du ikkje før har innsett at Luster er ein kommune med fine fjell, så vil kanskje tanken streife deg her ved fremste Skardsstølsvatnet. Like framme i dalen reiser Store Skagastølsstind seg 2405 meter over havet, og rundt den ei rekke flotte klatretindar. For den som vil opp på tindane utan dermed å måtte klatre, kan Nordlege Skagastølstind vere eit aktuelt mål. Stien held fram eit lite stykke aust for Tindeklubb-hytta, opp i skaret mellom Nordlege og Kolnosi. Derifrå er det strake vegen til topps. Heile vegen oppover er det steinurd, og på sjølve toppen er det nokså luftig og utsett.

Høgdeskilnaden mellom Turtagrø og fremste Skardsstølsvatnet er omlag 500 meter, og ein reknar 2-3 timar som normal gangtid.

Turtagrø-Fannaråken

Ta av riksveg 55 eit lite stykke ovanfor Turtagrø Hotell, og parker bilen ved stølen i Helgedalen, der det og er oppsett bom. Bomvegen er berre til privat bruk. Vegen til Fannaråken går til å byrje med etter denne private bomvegen, heilt til ein er fremst i Helgedalen. Her går ein over på vanleg sti, som er svært godt merka og såleis lett å finne. Ein kjem nokså fort opp til Ekrehytta, der ein og har to alternative ruter vidare. Den eine ruta går til venstre i bratte slyng opp mot skaret mellom Steindalsnosi og Fannaråken, medan den andre held fram i same retning til Keisaren, og vidare til toppen derifrå. Den fyrste av desse to rutene, den såkalla sommarvegen, er veldig bratt heile vegen frå Ekrehytta, og må seiast å vere ei nokså hard rute. Den andre ruta held fram forbi Skautevatnet og fram til Keisarpasset, der stien til Skogadalsbøen tek av nedover Gjertvassdalen. Frå Keisaren er det no ny stigning heilt til terrenget flatar ut på toppen av Fannaråken.

Høgdeskilnaden mellom stølen i Helgedalen og Fannaråken er omlag 1200 meter, og normalt kan ein rekne med rundt 4 timar opp sommarvegen og rundt 5 timar om Keisaren.

Turtagrø-Dyrhaugsryggen

Området rundt Turtagrø innbyr til toppturar. Ein av dei greiaste toppane er nettopp Dyrhaugsryggen, som endar opp på Store Dyrhaugstind, 2149 meter over havet. Ein køyrer fjellvegen mot Årdal til rett over stølen Ringane, og finn ein lagleg stad å parkere bilen. Då er ein i realiteten ved foten av Dyrhaugsryggen. No er det berre å ta stigninga fatt omlag rett sørover. Etterkvart blir det eit imponerande utsyn både mot Skagastølstindane i austleg retning og mot Soleitndane og Austabotntindane i sørleg retning. Dyrhaugsryggen er brei og sikker heilt fram til stupet ned mot Skagadalen. Vi tilrår ikkje å gå lengre enn hit, fordi ryggen blir veldig smal og utsett fram mot Store Dyrhaugstind. No kan ein sjå omtrent alle toppane i Hurrungane, og då skjønar ein også fort at her trengs heilt spesiell fjellkompetanse for å kunne ferdast trygt. Alternative ruter opp kan vere å køyre inn til Ringsdalen, og parkere bilen i enden av anleggsvegen der, eller eventuelt å gå innover Skagastølsdalen og komme seg opp på Dyrhaugsryggen frå den kanten.

Høgdeskilnaden mellom fjellvegen rett over Ringane og enden på Dyrhaugsryggen er omlag 1300 meter, og ein lyt rekne med omlag 4-5 timar opp.

Kinsedalen-Dalastølen

Sørsida av Lustrafjorden er eit fint fjellområde, sjølv om det er nokså bratt dei fleste stadane. Denne stølsturen tek til inst i Kinsedalen, etter at du har køyrt utetter sørsidevegen, forbi Urnes og vidare utetter nyevegen til Kinsedalen. Du svingar opp bygdevegen til Kinsedalen på vestsida av Kinsedalselva, og arkerer i enden av vegen. Her er det lurt å kontakte grunneigar for å få tilvist høveleg parkeringsplass. Stien framover er god å gå på og rimeleg lett å finne. Fyrst på vestsida av elva, seinare over på austsida. Til sist ein nokså hard stigning opp til Dalastølen. Rett over Kinsedalen ein annan fin støl, Kveken. I nordaust ligg Ingebjørgsfjellet, 1452 meter over havet, noko som kan vere eit høveleg mål for den som er ute etter fjelltoppar.

Høgdeskilnaden mellom bilvegen i Kinsedalen og Dalastølen er omlag 400 meter, og normal gangtid er rundt 1-2 timar.

Bergheim-Feigedalen

Utgangspunktet for denne turen er bilvegen utover sørsida litt utanfor Tallsete. Her er det råd å parkere bilen omtrent der vegen oppover mot Bergheim tek til. Etter omlag 300 meter stigning på god sti er ein oppe på den no nedlagde høgdegarden, med fint utsyn over Lustrafjorden og Lustrabygdi på motsett side. Vidare går stien innover i retning Feigedalen og opp gode 200 høgdemeter til, før ein er på Bergheimsstølen. Stien er ikkje særskilt merka, så ein bør vere påpasseleg før ein legg i veg frå Bergheim. Vidare passerer ein Øystølen, Hanafossen og Drivandefossen, før stølen Feigedalen, knappe 1000 meter over havet. I denne turguiden har vi ikkje nemnt vegen opp sør for Feigefossen, fordi den ikkje er fullgod like opp. I staden vil vi tilrå folk å køyre til parkeringsplassen ved garden Feigum like under Feigefossen, og derifrå følgje den merka stien opp under det særs flotte fossefallet.

Høgdeskilnaden er som allereie nemnt nesten 1000 meter frå utgangspunktet til Feigedalen, og ein kan rekne med vel 4 timar på vegen opp.

Krossen-Molden

Det finaste utsiktspunktet i heile Luster, blir det ofte sagt om Molden, og det er kanskje også tilfelle. Starten er ved vegen til Mollandsmarki, akkurat idet vegen flatar ut etter stigninga opp frå vegkrysset der ein forlet riksveg 55. Like etter ferista tek ein til venstre på skogsvegen og går etter den i omlag 300 meter. Deretter til høgre på god sti, merka med raud prikk. Etter omlag 1 kilometer inn på ny skogsveg og etter denne i omlag 600 meter, før ein er inne på stien for godt akkurat der skogsvegen svingar skarpt til høgre. No går det raskt oppover, og etter ein liten kneik når ein Svarthiller der utsikta er fin utover fjorden og over mot Ornes på den andre sida. Frå Svarthiller svingar stien 90 grader og går i bratte slyng forbi bratte hamrar. Deretter flatar terrenget ut og det er rimeleg lett fram til toppvarden på Molden, 1116 meter over havet. Den finaste utsikta er nok på austsida, ut mot indre deler av Lustrafjorden, med Nes og Høyheimsvik nærast.

Høgdeskilnaden mellom parkeringplassen ved Krossen og toppvarden er omlag 600 meter, og ein reknar 2 timar som normal gangtid opp.

Rupheim-Skogo-Skoganipa

Fjellområdet nord for Hafslovatnet har mange fine turar å by på, både om sommaren og ikkje minst om vinteren. Vi har valt å nemne ein av dei finaste, nemleg turen til Skoganipa, 1255 meter over havet. Utgangspunktet er bomvegen ved Rupheim, der ein kan parkere langs vegen. Hugs at her går det mjølkebilar forbi, så ein må setje bilen godt frå seg og såleis ikkje hindre trafikken i å passere. Vidare går det privat traktorveg fram til stølane Fossen og Skogo. Frå Skogo kan ein så passere Skoganipa på sørsida og seinare svinge nordvestover fram til sjølve toppen. Alternativt kan ein halde fram vest for toppen til stølen Hongi og komme opp på Skoganipa frå nordsida. Dette er ein stølstur i som høver for heile familien. Vegen er svært god og stigninga er moderat. Attende frå Skoganipa kan ein gå same vegen som opp, eller eventuelt gå utover Grøndalseggi, 984 meter over havet, og komme nedatt på vegen ved Bersetno.

Høgdeskilnaden mellom bomvegen ved Rupheim og stølen Skogo er omlag 300 meter, opp til Skoganipa er det ytterlegare 300 meter stigning. Ein reknar det som vanleg å bruke 2-3 timar til Skogo, pluss ein time til Hongi og endå ein ny time til toppen av Skoganipa, totalt altså 4-5 timar frå Rupheim til Skoganipa.

Soget-Simosete-Turrli

Ta av riksveg 55 ved vegkryss mot Hafslo sentrum og køyr vegen mot Veitastrondi til Soget, det vil seie enden av Hafslovatnet. Over brua og til venstre fram til romsleg parkeringsplass. Stien oppover er veldig godt rydda og merka så det skulle ikkje vere problem å finne fram. Ruta svingar etterkvart sørvestover mot stølen Simosete. Her er det fin utsikt ned mot Hafslovatnet og framover i nordleg retning mot Veitastrondsvatnet. Frå Simosete går stien vidare forbi stølen Lyst, via ein ny stigning før ein er på Turrli. Her er det fint å opphalde seg nokre timar før ein tek same vegen attende til bilen. Skal ein gå lengre er det fleire fine toppar i området. Nemnast bør Tylderingen, 1104 meter over havet, i nabokommunen Sogndal, der ein ser framover heile Dalavatnet i Sogndalsdalen. Også Simosetnipa er ein fin topp med sine 946 meter over havet, rett nord for Turrli. Begge desse toppane ligg utanom merka sti, så ein lyt sjølv finn den beste vegen til topps.

Høgdeskilnaden mellom parkeringsplassen ved Hafslovatnet og Simosete er omlag 300 meter, og ein reknar 1 time opp i vanleg tempo. Frå Simosete til Turrli er det nye 200 høgdemeter og omlag 1 times marsj.

Tungestølen-Austerdalsbreen

"The finest ice-scenery in Europe", sa den engelske fjellmannen William Cecil Slingsby om dei tre ville brefalla Loke-, Odin- og Torsbreen, som alle tre kastar seg ned frå Jostedalsbreen fremst på Austerdalsbreen. Ein liten smakebit av det ville brelandskapet kan ein få utan å nødvendigvis gå på sjølve breen. Utgangspunktet for turen er Tungestølen, turisthytta fremst på Veitastrondi. Stien går framover like over brua og er godt merka og såleis lett å finne. Den går på vestsida av Austerdalselva heilt fram til breen. Det er omtrent flatt heile vegen, med nokre kneikar av og til. Som alltid når det gjeld brear må ein vere veldig varsam og ikkje gå for nær isen. Isras og kalving kan inntreffe utan forvarsel, så hald god avstand. naturen er karrig ved brefoten. Det mest dominerande landskapselementet er moreneryggar, grus og stein, og enkelte stadar litt grønt gras. Frå fjellhistoria kan vi lese at nettopp denne breen vart oppdaga på eksakt same dagen, og det av to av dei store pionerane på Jostedalsbreen, Kristian Bing og William Slingsby. Det var Kristian Bing som bygde den varden på fjellryggen mellom Lokebreen og Torsbreen som seinare fekk namnet Kvitesteinsvarden, etter at han plasserte ein kvit kvartsstein på toppen av varden.

Høgdeskilnaden mellom utgangspunktet ved brua over til Tungestølen og breen er omlag 150 meter, og normal gangtid er omlag 2 timar.

Berge-Børesteinen

Dette er ein særs fin utsiktstur, der kontrastane mellom fjord og fjell kjem tydeleg fram. Du svingar av riksveg 55 inne i Luster, og køyrer gardsvegen opp til Berge, ein gard med uvanleg fin utsikt over Lustrafjorden. Det er ein fordel å snakke med folka på garden i samband med bilparkering og å komme inn på den rette vegen frå starten. Stien går til å byrje med i bratte slyng og er lett å finne. Du er snart opp ved den nedlagde stølen Ferestad, der det kan passe godt med kvile. Like etter Ferestad svingar stien litt ut mot fjorden før den igjen svingar til venstre opp mot målet for turen, Børesteinen. Dette partiet er forholdsvis bratt, så her bør ein halde godt auga med dei små. Oppe på sjølve Børesteinen er det storfelt utsyn utover fjorden og tvers over Dalsdalen med fjella Jagershaug og Fivlenosi. Om du har lyst til å gå lengre innover, såer det ei god trøyst at terrenget er mykje lettare. Eit naturleg mål kan vere Kinnfokkfjellet, 1406 meter over havet. Returen går same vegen som opp, men med slik utsikt som den du finn på Børesteinen, blir den utsett så lenge som råd er.

Høgdeskilnad mellom garden Berge og utsiktspunktet Børesteinen er omlag 700 meter, og ein reknar vanlegvis 2-3 timar for å vere normal gangtid.

Røssesete-Hellesetvatnet-Jagershaug

For den som allereie har vore på Børesteinen, er kanskje fjella på motsett side av Dalsdalen den neste utfordringa. Utgangspunktet for turen til Hellesetvatnet, og vidare til Jagershaug, er den nedlagde stølen Røssesete, ved enden av bomvegen frå Harastølen. Til Harastølen kjem ein ved å ta av riksveg 55 like ved taubana i Luster. Det fyrste stykket av stien opp frå Røssesete er svært bratt, men til gjengjeld så er han svært god og lett å finne. Etter nokre bratte slyng svingar ein så innover og forbi dei idylliske Osane, før ein brått står ved osen på Hellesetvatnet, 1115 meter over havet. På begge sider av vassosen er det fine fjell. I nordaust Jagershaug med sine 1392 meter over havet og i sørvest Grånosi, 1346 høgdemeter over havet. Begge desse fjella er forholdsvis lette å nå, og for den ekstra spreke let det seg fint gjere å bestige begge to same dagen. Den som vel Jagershaugen får eit fint utsyn over Mørkridsdalen og fjella innover mot Vigdalen.

Høgdeskilnaden mellom parkeringsplassen på Røssesete og Hellesetvatnet er vel 300 meter, og frå vatnet høvesvis 250 og 300 nye meter til dei to toppane Grånosi og Jagershaug. Gangtid til Hellesetvatnet er rundt 1 time.

Dalsdalen-Lø/Kringla/Hornane

Det er fleire fine turar i området rundt Dalsdalen. Ein av dei likaste har utgangspunkt ved Sage kraftverk, omlag midtvegs framme i dalen. Det kan vere like lurt å setje bilen her nede, og å gå den svingete bilvegen opp til den staden der ein tek av frå vegen, like før bilvegen kryssar Kolstadelvi. Vidare oppover blir det nokså bratt etter den smale og svingete vegen. Så snart terrenget flatar ut går ein over på god sti framover på austsida av Kolstadelvi. Dei tre stølane som er omtalte her ligg på kvar si side av elvi. Rett fram Hornane og til venstre over elvi Lø og seinare Kringla. Dette området er særs grøderikt og frodig, og ein bør nytte dagen godt før kursen vert sett heimover.

Høgdeskilnad mellom Dalsdalen og Lø/Hornane er er rundt 500 meter, medan Kringla ligg 100 meter høgare. Gangtid opp til Lø er rekna til omlag 2 timar, til Kringla rundt 3.

Yttri-Lønningane

Luster kommune er rik på stølar, sjølv om dei aller fleste i dag er nedlagde. Likevel blir stølsvegane ofte haldne godt vedlike, slik tilfelle er opp til Lønningane i Fortun. Utgangspunktet for denne fine stølsturen er garden Yttri på austsida av Fortunselvi. Det er lurt å snakke med grunneigaren for å avtale høveleg bilparkering. Stien oppover er god å gå etter og ikkje særleg bratt i starten. Etterkvart aukar stigninga på og ein vinn fort høgdemeter. Utsynet opnar seg mot Hurrungane på motsett side av Fortunsdalen, og ein ser store deler av Sognefjellsvegen oppover mot Turtagrø. Etter eit litt flatare parti og ein ny stigning, dukkar stølsvollen på Lønningane opp som ein idyll under den imponerande Tussen, eit fjell på 1232 meter over havet. Denne turen høver godt for familiar, særleg fordi stien oppover er svært god, men også fordi Lønningane er ein fin stad å tilbringe nokre timar.

Høgdeskilnaden mellom Yttri og Lønningane er rundt 600 meter, og ein reknar rundt 2 timar som vanleg gangtid opp.

Middalen-Illvassnosi

Dette er ein topptur som går utanfor oppmerka sti, og dessutan er det omtrent så langt nordaust det går an å komme i Luster kommune. Ein køyrer fram den lange og tidvis tronge og ville Fortunsdalen, og vil etter ei stund komme til Nørdstedalseter, den flotte DNT-hytta midt i Breheimen. Vidare til venstre i vegkryss på rimeleg god anleggsveg innover Middalen. Bilen kan parkerast litt før slutten på anleggsvegen. Som før sagt er det ingen sti, men det er svært fint å gå her i 1200 meters høgde. Ein kryssar tvert over Middalen og opp stigninga eit stykke aust for Løyfttjørni, like sør for sjølve toppen. Deretter nordover med utsikt framover mot Illvatnet og Vestre Holåtind. Etter å ha passert Illvassnosi på høgre side, tek ein til høgre opp i eit skar og seinare sørover til sjølve toppen. Her er det mektig utsyn over Middalen og sørover mot Fortunsdalen. Vi tilrår same vegen attende til bilen, men det er og mogeleg å gåvegen gjennom Bualøyfti, like aust for Illvassnosi.

Høgdeskilnaden mellom anleggsvegen og toppen er rundt 500 meter, og ein bør rekne med vel 2 timar til toppen.